„Joa, manchesmol duads no so wia bei ons friaher, wenn se aus onsre Halter-Heftla schbielet.“
„Ond von weit hergfahre kommed se mit ihre Audos noch Schwoiga – von Bottwar, Essleng, Woibleng, Fellbach , Weissach ond Lorch.“
„Dia miasset sich s zwoit Vierderle noch dr Prob vrheba, bis se wiedr drhoimda senn.“
„Ond en Dirigenda hend se, an reachda Kindschdler mit lange Hoar.“
„Seid letzschdem Joahr probed se mit Gsichtsmasga ond Abschdand, ond desinfiziered sich d Hend scho em Eigang. Ond jetzd isches ganz aus mit Proba.“
„A mächdigs Fescht hend se planed, aber des wird des Joahr nex, ond s Joahreskonzerd fällt au flach.“
„Jetzd isch honderd Joahr Jubileum ond koiner ka se schbiela hera!“
„Doch, mit deane moderne Kombjuder goaht des. Aufnahma hend se gmacht, jeder alloi für sich, ond des Difdele von Dirigend hot älles zsammagesetzd. Oina, dia furtzoga isch, hot ihr Aufnahm von Ravenschburg hergschickt.“
„Dees ka i joa schier net glauba, dass dees meglich isch!“
„Dann guck doch auf dene ihr Haumpeedsch www.mandolinenclub-schwaikheim.de , no siehschs mit oigene Auga!“
Manfred Rothfuß
Für die Berichtsserie "Mandolinenclub Schwaikheim besteht 100 Jahre"
