Übungslokale ond s´Vereinsheim
„Woisch no, en de Zwanzgerjoahr hemmer ons, dr Mandolinaclub Edelweiß, em Schwana droffa zom Schpiela ond schpätr em Hirscha.“
„Ond dann war a lengara Paus, net wega Corona, sondern wegam Adolf – doa isch dr s´Zupfa vrganga!“
"Joa abr glei nocham Griag isches weidrganga, wiedr em Hirscha ond scho 1947 hemmr a Konzert gschpielt.“
„Abr no ischs letz wora, wo dr Hirsch abgrissa worda isch, dass d´Haubtschdross broidr wird“.
“Bei s´Harschs en dr Lerchaschdross hemmr proba kenna em Soutterai, abr dann hot onsr Vorschtand dr Guido Carle en Haubtdreffr glandet, ond a richdigs Vreinsheim hergschafft.“
„Joa, a leera Schulbarracka, ond a hohaloher Brauerei hots noch Schwoiga brocht, mit dem Gegagschäft, dass mir dene ihr Bier abgnomma hend.“
„Jo, des war scho reacht, abr zerschda hemmr s´Fondamend macha miassa, ond do hend älle mitgholfa, mit dr Hand am Arm.“
„Pikklat, gschauflet ond bedonierd hemmr, bevor des Heisle aufbaut werda hot kenna.“
„Ond wo´s gschdanda isch, hemmrs enna ausbaut zomma zinftiga Vreinsheim.“
“D Eiweihong war em Moia 66, abr s´hot halt au a reachda Wierde braucht.“
„Do war joa d´Hedwig Bernhart ond ihr Ma, dr Johann!“
„D´Hedwig hot jo scho en ihrem Bauwaga Gäscht mit em beschda Hasabroda bewirded, a Bessara hädded mr net fenda kenna!“
„Ond en sellam Bauwaga hot dr Dirigend, dr Harbich Franz au no Gidarraschdonda gebba.“
„Dr Johann hot s´Vreinsheim scho nochmiddags aufgmacht, ond do sen Rendner komma zom Gaigla.“
„Jo, des waret scheene Proba em nuia Vreinsheim, ond drnoch sen dr neie Dirigend, dr Boegler Fritz ond dr Hilmar Heinz mit seira Ziddr no ens Remsdal gfahre ond hend Musik en de Besa gmacht.“
„Ond Feschdla hots gea oms Vreinsheim, mit dem scheena Obschgarda drhendr! Ond mit dr Kellerbar drondr!“
„Noch de Bernharts send dr Walter Strecker ond sei Frau, d´Ingrid Wirtsleid vom Vreinsheim worda, fiar 21 Joahr, do hot koinr hongrig hoimganga miassa ond durschdig scho gar ned! Ond dr Erich hot rond oms Haus gschaffet ond gmacht – bedoniert, Platta ond s´Elektrisch glegt, älles war beschdens vrsorgt. Ond sei weisses Spitzerhondle war älleweil drbei..“
„Ond seit de letzschde Joahr ka ma s´Vereinsheim au miata - für Familiafeschdla, Geburtsdäg, Konfirmaziona … do lässt sichs guat feira, wenn Corona vorbei isch!“
Manfred Rothfuß
Für die Berichtsserie "Mandolinenclub Schwaikheim besteht 100 Jahre"
